गत शुक्रबार बिहानदेखि जापानको होक्काइडो प्रान्तको हाकोडातेको तटमा लाखौँ संख्यामा मरेका माछा समुन्द्रबाहिर देखिएका छन् ।
यति ठूलो संख्यामा मरेको माछा देखेपछि स्थानीयवासी चकित भएका छन् । स्वास्थ्यविज्ञहरुले यी माछा नखान सल्लाह दिएका छन् । स्थानीय प्रशासनले पनि मरेको माछा घरमा नल्याउन आग्रह गरेको छ । किनभने, विषका कारण यी माछा मरेको हुनसक्छ ।
यी मरेको माछाको भिडियो सामाजिक सञ्जालमा भाइरल भइरहेको छ । जसमा हजारौँको संख्यामा मरेका माछा देखिएपछि स्थानीयवासी र वातावरणविदमा चिन्ता बढेको छ ।
समाचारअनुसार माछाहरू मुख्यतया सार्डिन र केही कम संख्यामा म्याकरेल हुन् । सामाजिक सञ्जालमा भाइरल भइरहेको भिडियोमा देख्न सकिन्छ कि मरेको माछाका कारण समुद्रको पानी करिब एक किलोमिटरसम्म सेतो देखिन्छ । यस्तो देखिन्छ कि समुन्द्रमाथि सेतो कम्बल फैलिएको छ ! तर यो मरेका माछाले ढाकिएको दृश्य हो ।
प्रशासनको कडाइका बाबजुद कतिपय स्थानीयवासीले यी माछा सङ्कलन गरी बिक्री गर्न थालेकाले यस्ता माछा खाँदा बिरामी हुने निश्चित रहेको जनाउ दिइएको छ ।
कसरी एकसाथ यतिका संख्यामा माछाहरु समुन्दी तटमा आइपुगे भन्ने सवालमा हाकोडेट फिशरीज रिसर्च इन्स्टिच्युटका अनुसन्धानकर्ता ताकाशी फुजियोकाले माछालाई ठूलो सिकारीले खेदेको हुनसक्ने बताएका छन् । खेदिएका माछाहरु अक्सिजनको कमीका कारण थकित भएका थिए र, अन्ततः किनारमा पसेको एपीले जनाएको छ ।
माछा खाने कुरामा फुजियोकाले भनेका छन् कि यी माछाहरू कुन परिस्थितिमा पखालिए भन्ने हामीलाई निश्चित रूपमा थाहा छैन, त्यसैले म तिनीहरूलाई खान सिफारिस गर्दिनँ ।
समाचार अनुसार जापानमा गत वर्ष र पाँच वर्षअघि पनि होक्काइदोको वाक्कनाइ शहरनजिकै भारी हिमपात भएपछि यस्तै घटना भएको थियो । यस अवधिमा पनि मरेको माछाको मृत्युको कारण अझै रहस्यमै छ।
