काठमाडौं : ‘द भ्वाइस अफ नेपाल सिजन ३’ काे उपाधि टिम प्रमोदबाट किरण गजमेरले उचाल्न सफल भएका छन् । गजमेरले उपाधिसँगै नगद २५ लाख प्राप्त गरेका छन् ।
सिजन तिनको फ़ाइनलमा टीम राजुबाट बाग्लुङकी तारा श्रीष मगर, टीम दीपबाट दार्जीलिङका आर्यन तामाङ र टीम तृष्णाबाट ज्वाला राई पुगेका थिए । फ़ाइनलमा पुग्ने तीनैजनाले द भ्वाइसकाे ट्रफी पाएका छन् ।
किरण गजमेरले उपाधि जितेपछि आफूलाई विश्वभरबाट भोट गर्ने सबै नेपालीलाई धन्यवाद दिए । किरणले भने–‘म यो मायाको लागि सधैं नै ऋणी भएको छु । मैले, अब नेपाली संगीतबाट केही लिने भन्दा पनि केही दिने बेला आएको छ ।’
टिम प्रमोदको प्रतिस्पर्धीले लगातार दोश्रो पटक नेपालकै नम्बर १ रियालिटी शोको टाइटल जितेका छन् । यसअघि पनि टिम प्रमोदबाटै राम लिम्बुले यो उपाधि जितेका थिए । यो रियालिटी शो हिमालय टीभीमा हरेक शुक्रबार र शनिबार बेलुकी ८ बजेबाट प्रसारण हुँदै आएको थियो ।
