टोक्यो : जापानमा चार वर्षअघि १९ जना व्यक्तिको सामुहिक हत्या गरेको अभियोगमा एक युवकलाई मृत्युदण्डको सजाय सुनाइएको छ ।
३० वर्षीय सातोसी उमाचुले २०१६ मा एक केयर होममा रहेका १९ जना अशक्त व्यक्तिहरुलाई छुरा हानी हत्या गरेको भन्दै उनी दोषी ठहर भएका हुन् ।
योकोहामामा भएको यो घटनालाई जापानको इतिहासमै एक डरलाग्दो घटनाको रुपमा चित्रित गरिएको छ । अभियुक्तका वकिलहरुले भने मानसिक रोगका कारण यस्तो घटना गर्न पुगेको भन्दै उनको बचाउ गरेका छन् ।
अभियुक्तले पनि जानाजान हत्या नगरेको अदालतमा जिकिर गरेका थिए । योकोहामास्थित उक्त केयर होममा उमाचुले अन्धाधुन्ध चक्कु प्रहार गर्दा अरु २६ जना घाइते भएका थिए ।
