काठमाडौं । एसीसी यु–१९ इस्टर्न रिजन क्रिकेटमा नेपालले चीनलाई १० विकेटले हराएको छ । मलेसियाको क्वालालम्पुरस्थित किनरारा ओभलमा बुधबार विहान भएको समुह चरणको पहिलो खेलमा नेपालले चीनलाई पराजित गर्दै सुखद शुरुवात गरेको हो ।
५४ रनको सामान्य लक्ष्य नेपालले मात्र ५ ओभरमा पुरा गर्यो । पवन सरार्फको विस्फोटक ब्याटिङमा नेपालले ५ ओभरमा नै जित दर्ता गरेको हो । सरार्फले २१ बलमा ६ चौका र ३ छक्काको मद्दतले ४६ रन बनाए । अर्का ओपनर रित गौतम १० रनमा अविजित रहे ।

यसअघि टस जितेर पहिला फिल्डिङ रोजेको नेपाल सामु चीनले ५४ रनको लक्ष्य प्रस्तुत गरेको थियो । चीनका ओपनरद्वय खेलाडीले समान १३÷१३ रन बनाउनु बाहेक अन्यले दोहोरो अंकको स्कोर छुन सकेनन् ।

नेपालका सागर ढकाल एक्लैले ६ विकेट लिए भने तिलक भण्डारीको नाममा ३ विकेट रह्यो । कमल सिंह ऐरीले एक विकेट झारे ।

जितसंगै नेपाल प्रतियोगिताको सेमिफाईनल प्रवेश गरेको छ । समुह चरणको पहिलो खेलमा सिंगापुरले चीनलाई हराएको थियो । योसंगै दुवै खेलमा पराजित हुदै चीन प्रतियोगिताबाट बाहिरिएको छ । अब नेपाल र सिंगापुर बीच हुने खेलले समूह बिजेताको टुंगो लाग्नेछ ।