कोरोनाभाइरस (कोभिड १९) को संक्रमणका कारण विदेशमा रहेका ८ नेपालीको निधन भइसकेको छ भने एक सय बढी संक्रमित रहेका छन्।
रोजगारी तथा अध्ययनका लागि विभिन्न देशमा पुगेका ८ जनाको ज्यान गएको र एक सय बढी नेपालीमा कोरोना संक्रमण देखिएको विभिन्न देशका दूताबासहरुले दिएको तथ्यांकअनुसार पुष्टि भएको हो। कोरानाभाइरसका कारण अहिलेसम्म अमेरिकामा ५ जना, युकेमा २ जना र युएईमा १ को ज्यान गइसकेको छ।
नेपाली दूतावासहरुका अनुसार विभिन्न १४ देशमा रहेका संक्रमित नेपालीको संख्या एक सय पुगेको हो। सबैभन्दा धेरै नेपाली अमेरिकामा संक्रमित भएका छन्। त्यहाँस्थित नेपाली दूतावासको जानकारीअनुसार मंगलबारसम्ममा ३२ जना नेपालीमा संक्रमण देखिएको छ।
तर बिरामीको जानकारी गोप्य राख्ने अमेरिकाको नीतिका कारण धेरै नेपालीको संख्या छुटेको दूतावासको अनुमान छ। केही दिनअघि अमेरिकामा रहेका ५ सय बढी नेपालीमा संक्रमित भइसकेको अमेरिकास्थित विभिन्न नेपाली संघ संस्थाहरुले बताएका थिए। तर, दुताबासको सम्पर्कमा आएका बिरामी ३२ जना रहेका छन्।
यो संख्या नेपाली दूतावासले पत्ता लगाएका संक्रमितको मात्रै हो। संक्रमितको विभिन्न अस्पतालमा र कतिपयको घरमै उपचार भइरहेको छ। अमेरिकामा हालसम्म संक्रमितको संख्या ४ लाख नाघेको छ। मृतकको संख्या बुधबार बिहानसम्ममा १२ हजार ८ सय ५७ पुगेको छ।
अमेरिकापछि बहराइनमा नेपाली संक्रमितको संख्या धेरै छ। त्यहाँ मंगलबारसम्ममा १२ जना नेपालीमा कोरोना संक्रमण देखिएको छ। युएईमा ११ जना र पोर्चुगलमा ११ जना नेपाली संक्रमित छन्। त्यस्तै, बेलायतमा १०, अस्ट्रेलियामा ८, स्विट्जरल्याण्डमा ५ र साउदी अरबमा ४ जना नेपालीमा कोरोना संक्रमण देखिएको छ। कुवेतमा पनि दुई जनामा कोराना संक्रमण देखिएको छ।
हङकङ, जापान, मलेसिया र इजरायलमा पनि एक एक जना नेपालीमा कोरोना देखिएको छ। चार लाख बढी कार्यरत रहेको कतारले भने कोरोना संक्रमितको संख्या देशगत रुपमा उपलब्ध नगराएको दूतावासले जनाएको छ। कतारले पनि विरामीको सूचना गोप्य राख्ने भन्दै समुदायगत रुपमा जानकारी दिएको छैन।
हालसम्म त्यहाँ संक्रमितको जम्मा संख्या २ हजार ५७ जना पुगेको छ। त्यहाँ कोराना संक्रमणका कारण ६ जनाले ज्यान गुमाएका छन्। चीनको वुहानबाट सुरु भएको कोरोना भाइरसका कारण हालसम्म १४ लाख ३२ हजार ३ सय ७३ जना संक्रमित छन्।
८२ हजार १ सय १४ जनाको ज्यान गइसकेको छ। नेपालमा हालसम्म ९ जनामा संक्रमण पुष्टि भएकोमा एक जना उपचारपछि घर फर्किएका खबर सुत्र न्युजले लेखेको छ।
