काठमाडौं : सत्तारूढ राष्ट्रिय स्वतन्त्र पार्टी (रास्वपा) का सभापति रवि लामिछाने र भारतीय प्रधानमन्त्री नरेन्द्र मोदीबीच नयाँ दिल्लीमा बुधबार भएको एक घण्टा लामो कुराकानी सामान्य शिष्टाचार मात्र नभई दुई मुलुकबीचको सम्बन्धलाई पुनः परिभाषित गर्नेतर्फ केन्द्रित रहेको छ।
भेटवार्ताका क्रममा भारतीय प्रधानमन्त्री मोदीले नेपाललाई प्राथमिक साझेदारको रूपमा लिएको बताएका छन्। त्यस्तै लामिछानेले नेपालको विकास साझेदारीमा जोड दिएका छन्। भारतीय प्रधानमन्त्री नरेन्द्र मोदीले भारतको ‘छिमेकी पहिलो’ नीतिअन्तर्गत नेपाल प्राथमिकतामा रहेको साझेदार भएको उल्लेख गरेका छन्। लामिछानेले विकास कूटनीतिको नयाँ युगलाई अँगाल्ने जनाएका छन्।
लामिछाने र मोदी दुवै जनाले सामाजिक सञ्जाल ‘एक्स’ मार्फत भेटवार्ताप्रति प्रसन्नता व्यक्त गरेका छन्। दुवै जनाको अभिव्यक्तिले विकास कूटनीतिको नयाँ अध्याय सुरु हुने हो वा भारतको नयाँ राजनीतिक सन्देश हो ? त्यसबारेमा केही समयपछि मात्र यकिन हुने भारतका लागि नेपालका पूर्वराजदूतहरू बताउँछन्।
