लुम्बिनी प्रदेशको विवादका कारण जनता समाजवादी पार्टी नेपाल (जसपा) विभाजनको संघारमा पुगेको छ । प्रदेशका चार सांसदलाई उपेन्द्र यादव पक्षले कारवाही गरेको र महन्थ ठाकुरले सभामुखलाई बेग्लै पत्र लेखेर जोगाउन खोजेपछि जसपामा विभाजनको सम्भावना बढेको हो ।
प्रदेश मन्त्रीको सपथ खाएका चारजना जसपा सांसदलाई जसपाका अध्यक्ष उपेन्द्र यादव पक्षले कारवाही गरेको छ । यादव पक्षले कारवाहीको पत्र पठाएपछि त्यहाँको प्रदेशसभाले उनीहरुको प्रदेशसभा सदस्य पद नरहेको सूचना टाँस गरिसकेको छ ।
तर, अर्का अध्यक्ष महन्थ ठाकुरले त्यहाँका प्रदेशसभाका सभामुखलाई बेग्लै पत्र पठाएर कारवाही नगर्न भनेका छन् । लुम्बिनी प्रदेशसभामा पूर्वराजपा नेपाल र पूर्वसमाजवादी पार्टी दुवैको संसदीय दलको समायोजन भई जसपाको ६ सदस्यीय संसदीय दल गठन भएको बताएका छन् । ठाकुरले उनीहरुमाथिको कारवाही वैधानिक नभएको जिकिर गरेका छन् । र, यही विषयलाई लिएर चार सांसदलाई सर्वोच्चमा मुद्दा हाल्न लगाउने ठाकुर पक्षको तयारी छ
अध्यक्ष ठाकुरले केन्द्रीय स्तरबाट लुम्बिनी प्रदेश सभा सदस्यहरुलाई कुनै कारवाही नभएको समेत जानकारी प्रदेशका सभामुखलाई गराएका छन् ।
