हड्ताल गर्दैमा गलत कार्यको समर्थन यो सरकारले गर्न सक्दैन: गृहमन्त्री थापा

काठमाडौँ, ५ वैशाख । यातायात व्यवसायीले सरकार विरुद्ध देशव्यापी हड्ताल गर्ने बताएसँगै गृहमन्त्री रामबहादुर थापा बादलले हड्ताल भए सार्वजनिक गाडीहरु कब्जामा लिएर सुरक्षाकर्मी प्रयोग गरी चलाउन प्रहरीलाई निर्देशन दिएका छन् ।

सरकारले सिन्डिकेट तोड्न यातायात व्यवसायी समिति खारेज गर्ने निर्णय गरेपछि त्यसको प्रतिकार स्वरुप यातायात व्यवसायीहरले देशव्यापी हड्ताल गर्ने बताएका छन् । मंगलबारको मन्त्रिपरिषद निर्णयलगत्तै गृहमन्त्री थापाले हड्ताल भएमा बस, ट्यांकरलगायत सार्वजनिक गाडी कब्जामा लिई सञ्चालन गर्न तयारी अवस्थामा बस्न प्रहरीलाई निर्देशन दिएका हुन्।

हडतालबाट सर्वसाधारणलाई मर्का पर्न नदिन बस कब्जामा लिएर सञ्चालन गर्ने गरी तयार बस्नू भनी प्रहरीलाई निर्देशन दिइएको गृहले जनाएको छ । सरकारले अत्यावश्यक सेवा ऐन लगाएर बस नियन्त्रणमा लिने बताएको छ ।

अन्य समाचार

काठमाडौं वैशाख । सभापति शेरबहादुर देउवाको सात्तो लिनसक्ने एकमात्र नेता थिए, स्व. खुमबहादुर खड्का । खड्का देउवाभन्दा सिनियर र उनका हरेक निर्णयका एक भागीदार थिए । भ्रष्टाचारको लेप लागे पनि खड्काले कांग्रेसभित्रको राजनीतिक वर्गमिटरमा आफुलाई उभ्याउने क्षमता राखेका थिए ।

कांग्रेस विभाजन गरेर प्रधानमन्त्री बन्ने देउवाको सपनारथ भरिपूर्ण पारिदिने सारथी पनि थिए । जनआन्दोलन–२ पूर्व विभाजित कांग्रेस प्रजातान्त्रिकको नेतृत्व देउवाले गर्दा वरियताका दोस्रो नेता खुमबहादुर नै थिए । त्यसैले महाधिवेशनपछि खड्काको एउटै अडान थियो– वरियताको दोस्रो र पदीय हिसावमा उप सभापतिको डिमान्ड ! यसै कारण पनि देउवाले महाधिवेशन सकिएको लामो समयसम्म पदाधिकारी नियुक्ति गर्न सकेका थिएनन् ।

संविधानले भ्रष्टाचारीलाई कुनै राजनीतिक जिम्मेबारी दिन नमिल्ने अनुमोदनमा लाहाछाप गरको कारण कांग्रेसभित्रको विधान मिचेर खुमबहादुरलाई उत्तराधिकारी बनाउने चाहना देउवामा नदेखिए पछि पदाधिकारी नियुक्ति भएनन् । बरु, खुमबहादुरसँगै सबैलाई ‘सती जाने’ अवस्था ल्याएर देउवाले विधान नै मिचिदिए । कांग्रेसको विधानले सभापति निर्वाचित भएको २ महिनाभित्र पदाधिकारी नियुक्ति गरिसक्नुपर्ने बाध्यकारी अनुच्छेद पारित गरेको थियो ।

अचानक खुमबहादुरको निधन भयो । अब देउवाको विचार बदलिएको छ । कांग्रेसभित्र शक्ति भए पनि आलोचनाको पहाडमा उनी रमाउन चहाँदैनन् । १६ चैतदेखि कांग्रेस केन्द्रीय समितिको बैठक स्थगित छ । आउने शुक्रबारदेखि निरन्तरताको तयारी पनि छ । तिनै खुमबहादुरको निधनले कांग्रेसभित्रको सर्वपक्षीय कोणबाट सुरू भएको मन्थन स्थगित भएको थियो ।

देउवाले सुचारू हुने बैठकमा पहिलो प्रस्ताव पेस गर्नेछन्– पदाधिकारी नियुक्ति ! उनका खल्तीबाट उपसभापति, महामन्त्री र सहमहामन्त्रीको नाम आउनेछ । बुढानिलकण्ठ निवासमा भएको छलफलको आधारमा टेक्ने हो भने देउवाले उपसभापतिमा विमलेन्द्र निधि, महामन्त्रीमा ज्ञानेन्द्रबहादुर खड्का र सहमहामन्त्रीमा रामचन्द्र पौडेलेको खल्ती अनुमोदन गर्नेछन् ।

गिरीजाप्रसाद कोइरालासँगको विद्रोहको सहयात्री बनेका विजयकुमार गच्छादारका लागि भने उनले ‘वरिष्ठ’ भन्ने नयाँ पद पनि बनाउन सक्नेछन् । वरियतामा गच्छादार हावी बनाउने देउवाको तयारी छ । यो तयारी कसैले रोक्नसक्ने छैन ।

पार्टी सभापतिको दपेटामा परेर कयौं पटक हण्डर खाएका देउवालाई थाहा छ– कांग्रेसको नेतृत्व अधिनायकवादी चरित्रकै हुन्छ । र, सभापति शक्तिशाली ! झन्डै तीन वर्षसम्म विधान मिचेर हिँड्दा पनि शक्तिकेन्द्रमा अलिकति चोट पाएका छैनन् उनले । कांग्रेसको डाइमेन्सन बुझेका देउवाले आलोचना बैठकहरूमा सुनेका छैनन्, मिडियाहरूमा पढेका छन् । ‘कांग्रेस लोकतान्त्रिक पार्टी भएकाले नेतृत्वलाई जति गाली गरे पनि सुन्ने धैर्यता बस्छ । तर विधानले दिएको अधिकारहरूले सभापतिको निर्णय अन्तिम हुन्छ’, एक केन्द्रीय सदस्य भन्छन् ।

लामो समय पछि बसेको बैठकमा कांग्रेसको कमजोरीका विषयमा धेरैले सवाल उठाए । तर स्वयं देउवाको कमजोरीका विषयमा पूर्वमहामन्त्री प्रकाशमान सिंहबाहेक कसैले हुंकार छाडेन ।

युवा नेता चन्द्र भण्डारी, प्रदिप पौडेल, कल्याण गुरूङलगायतका नेताले बैठकमा देउवाविरूद्ध वा उनलाई नै ‘प्वाइन्ट आउट’ गरेर कुनै आलोचना गरेनन् । तर विभिन्न मिडियामा उत्रिएर ‘देउवामा पदाधिकारी नियुक्ति गर्ने अधिकार छैन’ भन्ने बयान दिएका छन् । ‘मिडियाले अधिकार सुनिश्चित गरिदिने होइन त्यसका लागि सानेपामा बस्ने बैठकमा आफ्ना विचारमा बहुमत पुराउन सक्नुपर्छ । सभापतिविरूद्ध बोलेर चर्चा कमाउने भन्दा अरु केही काम होइन’, बुढानिलकण्ठ स्रोत भन्छ ।

देउवाले विधान कुल्चेरे कार्यसम्पादन समिति बनाएका थिए । संसदीय समिति पनि बनाए । त्यस निर्णयको मौखिक विरोध गरे पनि युवा नेताहरूलगायतले लिखित र विद्रोहको निर्णय गर्न सकेनन् । ‘यस्ता समिति आवश्यक थिएनन् र ? समयअनुकुलताका आधारमा सभापतिले निर्णय गर्ने हो’, देउवा निकट भन्छन् ।

देउवाले गर्दै आएका निर्णयहरूमा पार्टीभित्रका प्रतिपक्ष मानिने नेता रामचन्द्र पौडेलले आधिकारी र माइन्युटमा हुने गरि कुनै आपत्ति मानेका छैनन् । महामन्त्री डा. शशांक कोइरालाले पनि अहिलेसम्म कडा प्रतिरोध गरेका छैनन् । आधिकारीक विरोध सिंहले पहिलो पटक केन्द्रीय समितिको बैठकमा सुझावपत्रमा लिखित दिएका थिए ।

सभापतिको अधिकारले प्रयोगमा विरोध अथवा आलोचनाको कुनै अर्थ नहुने नेता डा. प्रकाशशरण महत बताउँछन् । कांग्रेसको भविष्यसँग जोडिएको विषयमा सभापति गम्भिर नै हुने उनको तर्क छ ।

देउवाले हिजो पार्टीभित्रको प्रतिपक्ष रहँदाको भोगालाई पार्टी सत्ता हातमा आएपछि अन्यलाई पनि अनुभूत गराइरहेको टिप्पणी कांग्रेसबारे जानकारहरू बताउँछन् । देउवामा गुनासा भन्दा केही नसुन्ने र निर्णय आफैंले लिने प्रवित्ति रहेकाले बाहिर कराउने र भित्र डराउनेहरूका मागको सम्बोधन हुन नसक्ने प्रष्टिन्छ । तर उनले महासमिति बैठक आह्वान गर्नसक्ने अनुमान गरिएको छ ।

Leave a Comment